Ehr Klaane, Grouße, Dicke, Dinne  /  es fraat mich eich do vorzufinne

Ich will eich do jetzt was berichte  /  aus unserer letzte Johresgeschichte

 

Wißt ehr noch, wie's do neilich so gedunnert un geblitzt hot

Un a Sirene an Schreikrampf gekrigt hot

Die Leit konnte vor laurer Krach nit penne

Die hewwe gemoant, es deijt irgenwou brenne

Sie hewwe geflucht un geschennt

Un sin in de Noachthemmer uff die Stroße gerennt

Un unser Feierwehr, die versoffe Bagage

Wor in Sem uff'm Kreisfeierwehrtag

Ewwer als de dann den Krach geheijert hewwe

Hewwe se sich uff die Socke gemoacht, im stremende Reije

Zu Fuß, per Rad, im Automobil

Mancher is gekroche, wie a Krokodil

Mit'm Feierwehrauto hewwe se die Korv gekratzt

Un dabei ganz scheij die Kotfliejel verkratzt

In Zimmern hewwe se dann gesucht un nit gefunne

De Brandherd wor oafach - er wor oafach verschwunne

Aaner hot in de Unnerhos' de Verkehr gereijelt

Die Zuschauer hewwe sich vor Lache gekeijelt

Un als se dann gemerkt hewwe, daß es iwwerhaupt nit brennt

Wollte se die Sirene abstelle, doch des hewwe se a nit gekennt

Sie hewwe gewackelt, getrere un gedrickt

Doch des Ding wor nit auszukrieje, es wor wie verrickt

Als se dann mit ehrne Kenntnisse woar'n am End

Hewwe se aan vun de HEAG geholt, der hot's gekennt

Die Sirene ging aus, geleert hewwe sich die Stroße 

Die Leit sin wirrer ins Bett - hewwe noch a bisje gebrewelt

Un sin dann oigeschlofe

D'rum ehr Leit, seid uff de Hut  /  wenn amol wirrer die Sirene tut

Nix wie in die Schlappe un uff die Stroße naus 

Sonst kennt ehr was verpasse, un dann roppt ehr eich vor Äijer die Hoorn aus

 

Un die Kapelle spielt hinnerher: "Was houn mer fer a Feierwehr!"

 

Zwaa Kerlche ganz lustig un vollgesoffe 

Die sin amol die Hauptstroß annegeschosse

Dann bleiwe se an dere Notrufseile steij 

Un dricke uff den Knopp, oh weij - oh weij

Un schon hot des Ding zu blinke ougefange 

Un denne Buwe is die Muff aans-zu-fuffzich gegange

Sie hewwe glei geschallt un sin gerennt 

Doch unnerwegs hewwe zwaa Kerle dem aane de Gummiknippel uff die Kutt  gebrennt

Wie dann a noch die Polizeisirene ertent 

Do hot er sich lousgerisse - hot dabei die Kerle verhehnt

Is die Angelstroß nunner gerennt, 's Gleckelche dorsch 

Dort hot er dann getroffe en annern Borsch

In's Auto is er eneu geschluppt  /  un hot sich hinner de Ricksitz geduckt

Do kimmt aach schunn die Polizei im die Eck geschosse 

Doch die Kerle hewwe im Auto vor Fraad aan gelosse

Denn bei dem Fängschesspeel um Mitternacht 

Hot die Polizei diesmol kaan gure Fang gemacht

Ewwer ehr Leit, losst eich soue  /  losst eich im Suff vun de Polizei nit joue

Denn es kann ach amol annerscht ausgeij 

Un mojens seht ehr eich hinner Gittern steij

 

Un die Kapelle spielt ganz keck: "Ei ei ei ei ei, die Kerlchen sin weg!"

 

Ehr liewe Leit vun vies a vie  /  kennt ehr schon die Story vun de Kih

Do neilich is was in de Beune passiert 

En Bauer hot friedlich soi Kih hoamgefiert

Unnerwegs mache die Viecher schun sou beijse Zicke 

Fange sich geijenanner ou zu dricke

Laafe die Beune schnurstracks anuff  /  denn sie hewwe gemoant, ehr Dor wär uff

Doch des Ding, des wor verschlosse 

Do sin die Viecher nach rechts geschosse

Die Leitkuh is in en Houf enoi gehippt  /  un hot dort a Auto hinne oigedrickt

Als de Besitzer des hot gehert  /  kimmt er die Treppe runner, ganz verstert

Er guckt in soin Houf un sieht voller Schreck 

A schwarzgefleckt Kuh - de Arsch voller Dreck

Sie hot gestanne, wie a Lamm  /  er hot se gestreichelt - ewwer dann

Sin die Annern aach noch in den Houf enoi gerennt 

Un hewwe mit ehrne Schwänz uff die Kotfliejel gebrennt

Denoch sin se iwwer soi Blummebeet gedappt 

Hewwe mit de Schnud die Schoiwerfer geschnappt

Die Stoußstang flog bis an die Garage  /  er hot gekriche: "Was a Bagage!"

Sie hewwe gefresse soi Tulwe un Narzisse 

Un hewwe aach noch in soin Houf enoi geschisse

Un als die Kih ehr Werk hewwe vollbracht 

Hewwe se sich gemietlich uff de Hoamweg gemacht

De Jakob hot de Schore, die Kih hewwe sich gefraat 

Die Versicherung muß zohle un dem Bauer dut's laad

Un die Moral vun der Geschicht 

Macht eier Dor zu, dann bassiert sou was nicht

 

Un die Kapelle gibt sich viel Mih und speelt des Liedche vun de Kih!

 

Ehr liewe Leit, ich will eich was soue 

Do hot sich vergange Owens was zugetroue

Do hot's a paar Kerle mit ehrm Auto nach Darmstadt getrewe 

Denn sie wollte uff hawaiisch was scheijnes erlewe

Sie sin in die Hawaii-Bar enoi un hewwe die beste Plätz besetzt 

Un uf de Stihl hewwe se vor Uffrechung ehr Hinnern uffgewetzt

Drin wor's so dunkel un die Athmosphäre wor schwiel 

Die Leit wou drin gesotzem wor'n noch recht kihl

Uff amol hot die Kapelle a Ding gespeelt 

Un aner hot dazu was furchtbares gekrelt

Dann is aach noch en Kerl hinne raus geschosse 

An's Mikrofon, ma hot grad gemaant, er wär besoffe

Ganz schwül gered, die Balke hewwe sich gebouje 

Was er gesagt hot, wor alles gelouje

Er gab bekannt, ein Inselweib  /  braungebrannt am ganzen Leib

Es Publikum hot ougefange zu douwe 

Als se sou a Dier do Hinne rausgeschowe

Sie stellt sich vor und rief: "Gudd bei  /  ich bin die Lola aus Hawei!"

Unner morz Applaus ging se dann in die Mitte 

Hot Bewechunge gemocht, wie a dermlich Micke

Ewwer als des Licht grell uff se fiel  /  sin die Zimmner gefalle vun de Stihl

Sie hewwe ougefange zu kichern un zu wimmern 

Un hewwe gekrische: "Die is ja vun Zimmern!"

Als de Chef des hot gehert  /  kimmt er ougerennt, ganz empert

Un seijgt zu denne Herrn: "Verloßt moi Lokal  /  eich mit ouzuhern is a Qual

Seht zu, daßt er Land gewinnt  / un kaaner vun eich meij zu mer kimmt."

Un die Moral vun der Geschicht 

Guckt denne Stripties-Mädchen nit sou genaa ins Gesicht

 

Lieb Kapelle spiel noch mal "Striptease-Lola, latsch doch mal!"

 

Ehr kennt doch die HEAG, die Organisation 

Die liwwert bei uns den alltäglichen Strom

Alle vier Woche, des is halt sou More 

Do werd bei de Leit des Stromgeld gehowe

Un wann de dann nit kannst pinktlich bezahle 

Kumme für dich ganz furchtbare Quale

Do steijste im Dunkle, des in halt sou Sache 

Siehst dich nit steij, herst dich blouß lache

Ich will eich nun was scheijnes berichte 

Es is nit geloue, es sin kaa Gerichte

Do is aam neilich was furchtbares bassiert 

Er is im Dunkle in a verkehrt Schlofstuwwe anoi marschiert

Dort hot er gestanne, er hot nix geseije 

Dabei is er gestolwert un hot uff aamol im Bett geleije

Dort stellt er fest, daß sich was bewecht  /  un hot sich glei dazu gelecht

Beim Fihle, ehr Leit, des wor ganz nett  /  er hot ja gemaant, es wär soi Kätt

Er hot se gestreichelt und berihrt  /  un dabei is es dann passiert

Die Fraa hatte Temperament wie an Gaul  /  do stellt er fest, do is doch was faul

Er sprang heraus, aus dem molliche Bett  /  un hot gesat: "Du bist nit moi Kätt!"

Er ging dann haamlich die Der enaus  /  die anner Der nin, da wor er zuhaus

Do stand soi Fraa, de Hund hot gebellt 

Sie hot gefragt: "Was hoste dann ougestellt?"

"Lieb Fraache", seijgt er "ich kann nix dazu 

Schuld is die HEAG, schuld bist aach du!"

Als dann wor de Nachwuchs gekumme 

Wor er mit de Nerve hunne

Er rief soim Kättche, bedauert soi Schuld 

Und seijgt: "Heb nur a bisje Geduld."

Er flüstert ihr ins Ohr und sagte: 

"Am Beste werrn mer dafür die HEAG verklage:"

Dann is er nach Darmstadt zur HEAG marschiert 

Hot alles verzeijlt, was 'm wor passiert

Die Herrn hewwe berore un viel gelacht 

Was der Kerl do hot in Zimmern gemacht

Dann steijt aaner uff un seijgt dazu: 

"Das Kind haast nit HEAG, des Kind haast wie du!"

Beschlosse wurde dann am Ende 

Bezahle muß er die Alimente

Un die Moral vun der Geschicht 

Bezahlt glei eier Stromrechnung, dann passiert sou was nicht

 

Un die Kapelle spielt auf Raten: "Wer soll das bezahlen?"

 

Ehr liewe Leit, do wor'n vier Dolle 

Die hewwe's gemoacht nach Oswald Kolle

Dehaam wor's recht haas, in de Stuwwe wor's schwiel 

Do sin se marschiert Richtung Ewwermiel

Dort sin se links ab, die Gersprenz anunner 

Hewwe vor sich her a paar schmutzische Lierer gesunge

Dann hewwe se vun weirem a Heisje erblickt 

Sin schnurstracks druff zu un hewwe 's Dersche oigedrickt

Do kreischt de aa: "Des kann mer lasse 

Des Plätzje is prima, es is aafach Klasse!"

Sie hewwe sich do drin uff die Erde geworfe 

Den Krom, wou se dabei harre, hewwe se gesoffe

Hewwe sich die Klarer vum Leib gerisse 

Un sich geijeseitig in die Näsje gebisse

Un als se wor'n so Mitte drin 

Kimmt dem aane was in de Sinn

"Mer mache's uff Preußisch, a bisje zackisch 

Mer singe a Liedche un doanze nackisch

Mer doun uns zärtlich uff de Fißjen rimtrere 

Wie unser Kamerade, druwwe in Schwere!"

Un als die Party fand ein End  /  hewwe se sich genumme bei de Händ

Dann hewwe se gekreelt: "Auf zu Attacke 

Mer reiße zusamme die alt Baracke!"

Des Inventar hewwe se araus geschmisse 

Die Ziejel vum Dach arunnergerisse

Un daß der Schlamassel nit werd entdeckt 

Hewwe se des Budche aach noch ougesteckt

Un als des Ding dann hot gebrennt 

Sin se schnell davougerennt

De Bechdamm entlang, schnurstracks nach Hause 

Die Party hot a End un de Kolle hot Pause

 

Un die Kapelle spielt auf der Rolle: "Des Liedche vum Oswald Kolle!"